كتب حازم حسين:
حازم حسين اتهم مهرجان الجونة بمقتل هند موسى
نجيب ساويرس

الزميلة هند موسى، رئيس قسم الفن في التحرير ماتت في حادث على طريق العين السخنة، وهي راجعة من مهرجان الجونة. وفاة هند الله يرحمها قدر طبعا، لكنه قدر مرتبط بأحداث ما ينفعش تجاهلها، خاصة إن التجاهل هيقود لتكرار نفس النتائج.

إدارة مهرجان الجونة في الوقت اللي بتصرف فيه قرابة 50 مليون جنيه على الحدث، وبتجيب كل من هب ودب بطيارات، حتى الكومبارسات والعيال السخيفة أمثال مروان يونس وخالد منصور، لمجرد إن دمهم خفيف على قلب آل ساويرس وبيعرفوا يضحكوهم، ما اهتمتش بتوفير نفس وسيلة الانتقال للصحفيين، ولا حتى توفير وسيلة انتقال آدمية.

إدارة المهرجان حشرت الصحفيين في غرف مزدوجة متوسطة المستوى، في وقت حطت فيه بعض المشهلاتية والمحسوبين على الميديا في أجنحة وغرف خمس نجوم، وخلال فترة المهرجان كانت معاملة الصحفيين بائسة جدا على كل المستويات، بشهادة زملاء كانوا في الجونة.

انتقالات الصحفيين داخل المدينة كانت بأتوبيسات، لكن إدارة المهرجان ما أعرفش ليه في العودة ركنت الأتوبيسات دي على جنب وقررت بشكل عجيب تستدعي سائقين من القاهرة فجر الجمعة بعربيات صغيرة ياخدوا الصحفيين، ولأن السائقين مش محترفين ومطبقين وعينهم ما نامتش، كان طبيعي تحصل كارثة، ومش مفهوم ليه إدارة المهرجان المحترمة ما وفرتش باصات جيدة لعودة الصحفيين.

الموقف الزبالة ده متكرر مع الصحفيين في كل فعاليات آل ساويرس، سواء المهرجان أو بطولة الاسكواش أو جائزة ساويرس أو جائزة أحمد فؤاد نجم، ومش فاهم ليه الزملا والمؤسسات الصحفية مش بياخدوا موقف من التجاوز وقلة الاحترام دول؟! ربما تكون مقاطعة النوعية دي من الفعاليات وسيلة مهمة لإصلاح الخلل وإجبار العميان يشوفوا من الغربال.

علشان محدش يقول الموضوع فيه مزايدة أو ترصد لفعالية ثقافية.. ربع ميزانية الأوبن بار خلال فترة المهرجان كانت كافية جدا لنقل الصحفيين بطيارات خاصة ذهابا وعودة، فيه بذخ مبالغ فيه جدا في نفقات المهرجان، لا يتماشى مع الحدث ذي الطبيعة الثقافية ولا مع فكرة الدور الثقافي ولا مع ناس رايحة تشوف سينما وتعمل وورك شوبس وندوات، مش رايحة تسكر وتاخد تان وتتقابل على الريد كاربت.

المهرجان مجرد بيزنس، ملوش علاقة بأي ثقافة.. عائلة ساويرس بتسوق مدينة ساويرس السياحية «الجونة» وبتستغفل الفنانين والصحفيين والمهتمين بالثقافة.. لو الموضوع دور ثقافي حقيقي كان ممكن يعمل المهرجان في القاهرة أو مطروح أو شرم الشيخ أو بلد العيلة سوهاج أو حتى يدعم مهرجان القاهرة اللي هو الوحيد المعترف بيه في المنطقة ضمن المهرجانات الدولية.. الموضوع «شو» ووجاهة، بالظبط زي وجاهة جايزة ساويرس عديمة اللون والطعم، وجايزة نجم اللي بتمثل عار حقيقي على اسم نجم وعلى الشعر، وزي تماحيك نجيب في أحمد فؤاد نجم الله يرحمه وإنه يعمل له عيد ميلاد سنوي بيتكلف 100 ألف جنيه علشان يتباهى بإنه صديق نجم وبتاع ثقافة.

وفاة هند الله يرحمها نهاية طبيعية لمسلسل تجاوزات وقلة ذوق حاصلين من بداية مهرجان الجونة.. وشخصيا ما أقدرش أفصلها عن سرقة حق خضر وطرده من الشركة المنظمة.. إهانة الصحفيين بالطريقة دي نتاج نفس العقلية، الاستقواء بسطوة المال، والارتكان لشراء ذمم شوية إمّعات محسوبين على الثقافة والفن وينفع يكونوا أولتراس للدفاع في وقت الزنقة.

لو الزملا في الشغلانة ما أخدوش موقف من الزفت ده.. يبقى حقيقي هما عاجبهم اللي بيتقال عليهم في دواير نجيب: بييجوا ياكلوا ويشربوا ويهمبكوا ببلاش.

Copy URL to clipboard


























شارك الموضوع

Copy URL to clipboard

ابلغ عن خطأ

لقد تم إرسال رسالتك بنجاح

نسخ إلى الحافظة

أدخل رقم الهاتف أو بريدك الإلكتروني للإطلاع على آخر الأخبار