رغم القلق الذي يعيشه العالم بعد انتشار فيروس كورونا المستجد، إلا أن الفنان المصري رامي جمال قال إنه متفائل بإن تلك الأزمة ستنتهي قريباً.
كتب جمال عبر صفحته: (تعالو نتكلم جد شويه.. أولا أنا متفائل جدا أننا لو عملنا التعليمات اللي الدول اللي سبقتنا عملوها، من حظر منزلي ونضافه وتعقيم، والله هنفوت مرحله الخطر، وأنا مش مع الخوف المبالغ فيه، بس أنا مع الحرص المبالغ فيه في مرحله زي دي، احنا شعب بيبان معدنه وحضارته في وقت زي ده، بلاش تجمعات، بلاش علشان منندمش في وقت متأخر).
تابع: (تاني حاجه ودي مهمه جدا جدا، ياريت نراعي مشاعر كبار السن وأصحاب الأمراض المزمنة والمناعيه، اللي عمالين نطمن بعض أن هما اللي في خطر والباقي في أمان، الكلمه الحلوه صدقه والمعلومة الطبيه تتقال بذكاء، علشان منزودش قلقهم).
اختتم حديثه: (اخيرا بإذن ربنا الأطفال والشباب مفيش خوف عليهم الخوف منهم، لأن منظمه الصحه والأرقام بتقول كده، يبقي ياريت نبقي عارفين أننا ممكن نبقى سبب في عدوي لناس بنحبهم، وممكن بتجنب الاختلاط والبوس والأحضان والخروج لفتره ننجيهم من خطر ممكن نندم عليه باقي عمرنا، وأخيرا ربنا هيحفظنا والله ده يقيني في ربنا، بس نعمل اللي علينا، مش لازم نستني أن يتفرض، أنا براهن علي ذكاء المصريين وحبهم لبلدهم).