تعرضت المذيعة المصرية بسمة_وهبة، لهجوم كبير بعد رسالتها باللغة العبرية للصهاينة في ظل الأزمة الفلسطينية الراهنة.
بسمة عبرت عن استيائها الشديد من الانتقادات التي تعرضت لها بعد توجيهها رسالة إلى إسرائيل باللغة العبرية، مشيرة إلى أنها قررت أن تتحدث عن أزمة فلسطين بالعربية وجلبت خبراء لترجمة حديثها بالعربية.
وقالت بسمة وهبة في لقائها ببرنامج 90 دقيقة: أنا قلت النهارده أريح الزبون والناس اللي مش عاجبها لغتي في العبري، قررت أتكلم بالعربي علشان ما أضايقش حضراتكم وأجيب حد يقول اللي بقوله بالعبري لأنكم حساسين أوي من طلاقة اللسان، يعني مش زي اللي بيتكلم أنجليزي وفرنساوي نص نص لكن العبري لا لازم نكون متقنينه وتكون بسمة راحت عاشت في إسرائيل فأتقنته أو عملت فيلم قعدت ست أشهر زي مهمة في تل أبيب تتعلم العبري زي الفنانين الجمال ما علموا، لما تكون في وسط مذبحة فيها أخوننا وأسرنا وأهلنا الفلسطينيين وكلمتين عاوزين يتقالوا بالعبري قررت أقولهم وأنا في العربية وتحسب لي هذه المحاولة.
وأضافت: الغريب أني لما فتحت أكونتات الناس اللي بتهاجمني لاقيتها أكونتات فايك معمولة إذا دي حملة ممنهجة من مين وليه مش فارق معايا، بس الأهم إن الرسالة بتاعتي وصلت لإسرائيل واللي مش عاجبه يعمل زي واللي غيران مننا يعمل زينا.
وتابعت: والله ما ندمنت لحظة أني عملت كده، والناس اللي بتتريق في منتهى السخافة ولا تسوى شيء لأنهم سابوا الحدث والموضوع وقعدوا يركزوا في حاجة مالهاش علاقة بالمشكلة والحدث اللي إحنا فيه، وأنا هعمل شغلي وأنجح أكتر وهستمر اكتر بإذن الله تعالي.
وأكدت بسمة وهبة في برنامجها أن هناك مخطط متكامل الأركان ضد فلسطين من قبل الاحتلال الإسرائيلي، قائلة: فيه مخطط لتدمير غزة، وفيه مخطط لتدمير المساجد وتدمير الكنائس ولزهق الأرواح في فلسطين، والاستيلاء على غزة، وفيه مخطط لاستخدام الأسلحة المحرمة دوليا ومخطط للقضاء على الفلسطينيين من الكبار والأطفال والنساء والرضع.
وأضافت بسمة وهبة: جيش الاحتلال عاوز يهدم المسجد الأقصى علشان يبنى الهيكل المزعوم وهدم الأقصى الغرض منه فك ارتباط العالم الإسلامي بفلسطين وربط يهود العالم ببناء الهيكل، وكانوا جايبين خمس بقرات حمر من ولاية تكساس الأمريكية رئيس الطائفة استقبلهم، وجابوهم علشان يذبحوهم ويطهروا موقع المسجد الأقصى بدمائهم وده حسب عقيدة بعض الطوائف اليهودية بيحمل إشارة الى قرب هدم المسجد الأقصى وبناء الهيكل.
