تحدث الفنان المصري تامر حسني، عن أهمية المواظبة على الصلاة، موضحًا إن حديثه من واقع تجارب شخصية مر بها.
كتب حسني عبر صفحته:
“أنا مش شيخ ولا عامل بنصح أنا بتكلم عن حاجات مريت بيها في حياتي وكانت من أسباب وصولي لحلمي، إتمسك بالصلاه أياً كنت بتعمل إيه”.
تابع:
“إوعى تقول ربنا مش هيقبل صلاتي وإوعى تصدق اللي يقولك كده إوعى تحكم إنت على ربنا وتشك في رحمته إنه مش هيقبل لا دا غلط كبير ربنا أكرم وأرحم من ما تتخيل ومهما أي غلط بتعمله مسير صلاتك تخليك تقلل أخطاء وواحده واحده لحد ما تبقى في المسار السليم اللي برضو هيكون فيه أخطاء ولكن أقل ويتبعها إستغفار وتصدق وتوبه”.
اضاف:
“حتى لو رجعت تاني لنفس الأخطاء ورجعت عاشر ومليون إرجع تاني ومليون لربنا وأطلب منه العفو و المغفرة المهم تخليه قدام عينك طول حياتك، خلوا بالكوا في أفكار بتسوق العالم ناحية إن الشخص المتدين أو الملتزم أو اللي محافظ على صلاته إنه يتكسف يقول ده قدام الناس لإن ممكن أصحابه يضايقوه بالكلام بما إن الجانب الشيطاني بقى قوي أوي في العصر ده”.
اقرأ: حسين فهمي يعلن عن دورة جديدة من مهرجان القاهرة
استكمل:
“بس إحنا لازم نقاوم النوع ده من الفكر ونفتخر إننا بنصلي وبنركع لواحد بس وهو اللّٰه سبحانه وتعالى ومهما علي شئننا ومهما عملنا ذنوب بنركع برضو وبنتوب ونستغفر ونشكره على كل حال ونطلب منه اللي بنحلم بيه ونثق إنه هيرزقنا إذا كان بيرزق الجنين في بطن أمه والنمله في جحرها والطيور في السما”.