اجتمعت الفنانة المصرية رانيا فريد شوقي، بالنجم المصري الراحل فاروق الفيشاوي، خلال مشاركتهما في مسرحية (الملك لير)، التي تعد آخر عمل تمثيلي قدمه قبل وفاته.
رانيا تحدثت عما دار في كواليس آخر عرض قدمه الفيشاوي، وقالت: (فاروق الفيشاوي، أعلن في مهرجان إسكندرية إنه مريض بالسرطان، وقال أنا هتعامل على إنه صداع، وحقيقي ده اللي حصل كنا بنعمل بروفات مسرحية الملك لير، عمره ما جه مكشر أو حزين بالعكس دايما بيضحك، ويهزر مع كل الناس من الصغير للكبير، وكان دايما يقولي يا بنت الملك ويعد يحكي لي حكايات هو وبابا، ولأنه إنسان أوي، هو عارف إن سيرة أبويا بتسعدني فبيتعمد يحكي عشان يسعد قلبي، وهو كمان من حبه لبابا بيبقى سعيد إنه بيتكلم عنه ويترحم عليه).
تابعت: (وقالي تعالي أوريكي أنا عامل إيه في أوضتي في المسرح لقيته معلق صورة أبويا وفنانين من الزمن الجميل وابتدينا عرض المسرحية والله العظيم عمره ما حاسينا إنه مريض أو تعبان بالعكس كان دايما بيهزر ويضحك ويستمتع بالتمثيل لدرجة إننا نسينا إنه مريض وحتى لما اعتذر عن السفر مع المسرحية للسعودية ما قالش إنه تعبان ولما رجعنا من السفر عرفنا إنه دخل المستشفى في حالة حرجة كنا هنتجنن عايزين نطمن عليه لكن للأسف ممنوع الزيارة وعرفنا الخبر المؤلم كان نفسي أشوفه بس عارف يا روقا أنا اتعلمت منك القوة وحب الحياة وإن مع المرض مش لازم أكون ضعيف وأفضل أعافر وأقف على رجلي لآخر لحظة استمتع بالحاجة اللي بحبها وهي التمثيل وأشوف حب الناس ليا).
اختمتت: (وتصقفهم الحار ليك كل يوم أكيد ده كان بيسعدك وأنا شفت ده في ضحكتك وعيونك اللي كانت بدمع أثناء التحية ياه إيه جمالك ده لا اشتكيت ولا كنت حتى بتتكلم عن مرضك كأنه مش موجود وكنت راضي باللي ربنا كتبهولك يا تعيش يا تموت وأنت اختارت تعيش وتتبسط وتبسط اللي حواليك لآخر لحظة ضحكتك ما بتفرقنيش الله يرحمك، ويجعل مثواك الجنة ويجعل صبرك ورضاك وجدعنتك والخير اللي كنت بتعمله وكل إنسان أنت أسعدته وجبرت بخاطره في ميزان حسناتك يارب هتوحشنا أوي).
