نعت رشا سامي العدل، ابنة الفنان الراحل سامي العدل، شقيقها أحمد الذي رحل عن عالمنا أمس.
كتبت رشا عبر صفحتها:
(قاعدين علي البحر في دهب في ساعة غروب بنضحك وبنعيط سوا ونشتكي لبعض قد ايه ابونا وحشنا وقد ايه الحياة من غيره صعبة فضفضنا لبعض ووعدنا بعض بحاجات كتير… رجع القاهرة علي وعد بلقاء قريب نتجمع فيه تاني … وجيه اللقاء بعد مكالمة تليفون الحقي اخوكي تعبان في المستشفي جريت عليه لقيت التعب والألم زايدين علي عمره عمرين مش عارف يتنفس وكلامه بصعوبه قعدت اكلمه واضحكه وأحاول اهون عليه شوية واسيبه يرتاح شوية).
تابعت: (وفي عز محاولاتي نقله لمستشفي تانية فقد نبض قلبه لثواني قدامي اتخضيت الدكاترة طمنوني و قالوا مفيش حاجة اهو زي الفل بس قلبي وجعني و لقيتني بقول له عايزاك تسبح وتقول الشهادة معايا و تفضل تقول كل القرآن اللي انت حافظه يا دوبك لفيت ظهرى و لسة هاخرج اشوف موضوع الإسعاف و نقله لقيت دكاترة و ممرضين في كل حتة حوالين احمد بيحاولوا ينعشوه ٣٨ دقيقة علي الساعة محاولات و انا واقفة قدامه قلبي بيتقطع و روحي انا بتطلع مني ماسكة في خيط امل من الدخان اتقطع ب اخر نفس منه …. و راح أحمد ، اخويا الصغير الطيب الحنين الهادي).
وكانت رشا سامي العدل، أعلنت عن وفاة شقيقها أحمد العدل، وكتبت عبر حسابها: “إنا لله وإنا إليه راجعون توفي إلى رحمة الله المغفور له بإذن الله أخويا وروحي أحمد سامي العدل”.
وتابعت: “برجاء الدعاء له، اللهم اغفر له وارحمه وادخله الفردوس الأعلى بغير حساب ولا سابقة عذاب واجعل قبره روضة من رياض الجنة”.
أحمد سامي العدل ممثل ومخرج وهو ابن الفنان الراحل سامي العدل، وشارك بالتمثيل في مسلسل “فوق مستوى الشبهات” بطولة الفنانة الكبيرة يسرا، ومن أعماله مسلسل “حارة اليهود” وعمل مساعد مخرج في مسلسل “الحساب يجمع”، ومساعد مخرج في مسلسل “ضد الكسر” بطولة نيللي كريم، كما شارك في السينما في فيلم “اعز الولد” عام 2021، وكانت اخر مشاركته في الفن في مسلسل “جميلة” حيث عمل سكريبت حركة خلاله.
الفنان سامى العدل رحل عن عالمنا 10 يوليو عام 2015، عن عمر يناهز الـ 68، بسبب هبوط حاد في الدورة الدموية نتيجة ضعف في عضلة القلب.
