كتب الزميل جوزيف قرداحي:
ما شفت اوقح من اللص القتيل يللي اقتحم منزل نانسي عجرم إلا أهل اللص القتيل يللي بدل ما يشعروا بالخجل والعار، عم يجربوا شتى الوسائل لابتزاز نانسي وزوجها فادي الهاشم.
تارة بيطالبوا نانسي باحتضان اولاد اللص القتيل، على علمي نانسي وزوجها رغم الألم والصدمة ما عندن مانع .
وتارة أخرى، بيخترعوا أخبار وبيفبركو صور لإيهام الرأي العام ببراءة اللص القتيل رغم كل الاثباتات الدامغة يللي شفناها بفيديوهات كاميرات المراقبة…
والأوقح من كل هيدول هم الناس يللي انهانت كرامتن لما كشف الاعلام هوية اللص السورية!
انو شو المطلوب يعني يخترعولكن هوية تانية لهاللص الوقح ت ما تنخدش كرامتكن؟!
يا عيب الشوم، أقل موقف كان من واجبكم اتخاذه اذا خايفين على كرامتكن هو إدانة اللص والشعور بالعار من إقتحامه المسلح لمنزل عائلة آمنة ومش تحويله الى ضحية!