منذ 6 سنوات 
حين تطل النجمة السورية سلاف فواخرجي تذكرنا بوالدتها الكاتبة الراحلة.. هكذا تخاطب سلاف متابعيها ونحن منهم.
(صباحكم شامي
صباح الشام وبيوت الشام وأهل الشام..
صباح الجنينة وأرض الديار والبحرة والياسمينة.. ياسمين ابيض وأصفر وأزرق وعراتلي..
وصباح النارنجة والليمونة والكبادة..
وصباح البرتقانة (برتقالة) والكريفون والأكدنيا والدرابزين والبومللي..
وصباح الوردة الشامية الجورية اللي مافي متلها بالدنيا كلها… وصباح اللي معربش عالحيطان متل المجنونة حمرا وبنفسجية واورانجية.. وصباح الست أم كلثوم نفسها وأم كلثوم.. وصباح عطرالليل الكولونيا..والريحان.. وكمان سوالف العروس..والضراير ولسان الحماية (هاد بيكون شوك والكناين بيديروا بالهم عليه.. هيك بيقولوا ! )..
وشو كنا نفرح ونلعب ونحنا صغار بتم السمكة . .. وكله كوم ودوالي العنب كوم..بلدي وحلواني وكله بيأرش..والعنب البلدي والعنب الزيني…مابيقولوا (عنب الديار بيطول الأعمار )
وقديش حلو شكل ( الساعة ) والبنفشا اللي كلها لي كلها زرار.. وياعيني عالمانوليا وعلى ريحة المسكة.. وصباح الزريعة المنتورة هون وهون… عالبحرة وعالحيط وعالشبابيك وعالدرج بحواض وفخارات وتنكات وفيها أوراق القصب..والشمشير..والهوا حيفا المهفهف كتير..والقرطاسية..والبوغونيا.. والختميةوالميريميةوالمليسة.. والدادا.. وصباح الشب الظريف… والجميل.. وآه يا أنا ( اسم نبتة ).. والعطرة.. والشكرية والهرجاية..والبرنجك والمدادة..والمكحلة والسجادة..واللحلح..والزلف.. وفي منهم اسماءهم غريبة عجيبة بس الها معنى مو اي كلام.. متل ليلة القدر التي بتتفتح في ليلة واحدة بس بالسنة ! والمحكمة..وكف العروس..وراخي شعرو.. ولازم ولابد يكون في قطعة ( غناجة ) اللي كل مالمسنا وراقها بتسكر لحالها وبترجع بتفتح بعد شوي والسيكارة أو جيكارة..وورق الصالون.. وقلب عبد الوهاب (اه على عبدالوهاب) والشمعة..والمضعف الأصفر والطقطيقي اللي فيه شوية زهر والمطبق اللي في كتير زهر.. وعنجد في أحلى بالدنيا من النرجس..والفل والقرنفل .. والزنبق ؟ ولا البنفسج(اللي بيبهج وهو زهر حزين)؟ وبيبقى البلدي لاقبله ولابعده بيكفي انو اسمه بلدي .. هي صورة كتير صغيرة من بلدي ربي يحميلي بلدي وصباحات بلدي)
)
