كشفت الفنانة حورية فرغلي عن تفاصيل حادث سقوط الحصان عليها الذي تسبب في كسر أنفها أثناء حلولها ضيفة على بودكاست “Restart”.
قالت حورية: “الحصان وقع فوق مني، وعملت 28 عملية وقعدت كذا سنة لا بشم ولا بستطعم ولا طعم الأكل والبرفانات كنت بشتريها مش عارفة ريحتها ايه”.
اقرأ: حورية فرغلي تخضع لجراحة مدتها تسع ساعات
وأضافت: “أنا فضلت كده 4 سنين تقريبًا، ودلوقتي بقيت استطعم وبشم وأخيرًا بنام وأنا مش باخد نفسي من مناخيري مش من فمي ومكنتش بعرف أنام”.
وبسؤالها هل مؤمنة بوجود العين والسحر: “اه اتعملي سحر ولسه معمول ولغاية دلوقتي”، موضحة: “ومتقاليش إسم اللي عمله بس إتقالي الأوصاف وعشان أفكه لإنه سفلي واللي عمله حد أعرفه زارني مرتين أوي 3 وهو حد في شغلي في ورقة كده مكتوبة حورية بنت نرجس تصاب بالمرض وتصبح طريحة الفراش ويقف زواجها ورزقها”.
وتابعت: “وهي واحدة في الوسط وعرفت هي مين ومش بتعامل معاها دلوقتي ومعرفش حاجة عنها ولو شوفتها هسلم عليها عادي، وأنا حاولت أفكه بس قالولي ده سفلي وعشان تفكيه لازم تستعيني بالجن عشان نفكهولك وده كده حرام فرفضت”.
وأضافت: “أنا بالنسبالي لو ربنا مكنش عايز العمل ده يتعملي مكنش هيحصل ومفيش حاجة بتحصل الا أما هو يوافق وربنا هو اللي عايز ده وهقعد ليه ومش ليه وأنا راضية وأكيد في حكمة هعرفها واتعلمها”.
اقرأ: حورية فرغلي ترد على تشبيهها بمايكل جاكسون!
وبسؤالها عن إذا كانت ظلمت أحد، قالت: “اه ممكن ظلمت، ولما جيت من دبي كانت حالتي النفسية مش كويسة فأتجوزت 3 شهور وأطلقت، وماما كانت عايزاني أخرج للحياة وأخرج من صدمة وفاة خطيبي، وكان مصري وكان إبن حد معروف وهو حبني بس ماخدناش فرصتنا إننا نعرف بعض والموضوع جه بسرعة، والإنفصال كان مني أنا فأنا ظلمته ودلوقتي إتجوز وخلف وولاده كبار، وهو إبن الأستاذ أحمد فراج هو حاتم إبنه وعلاقتنا كويسة جدًا وأنا حاسة إني ظلمته”.
وعن أدوار الأغراء التي أدتها وإنها صنفت ضمن ممثلات الإغراء، أكدت: “أنا متحسبتش على ممثلات الإغراء في بدايتي وكان هو دور كلمني شكرًا اللي على الكومبيوتر وبعد كلمني شكرًا عملت كف القمر وبعد كده مع أستاذ جمال العدل عملت الشوارع الخلفية وسيدنا السيد ومنتقم وحكايات بنات وساحرة الجنوب وآخر حاجة عملتها أيام”.
وعن رأيها إذا كان الوسط الفني به محسوبيات، أجابت: “الوسط الفني عالم مخيف وأنا عن نفسي بحس إني غير مرغوب فيا لما حصلت الحادثة، ومش ملوش أمان وأنا شوفت أحسن حاجة وأوحش حاجة مفيش وسط وأنا مقدرش أقول أن الوسط وحش وأنا بسمع لكن مشوفتش”، موضحة: “أنا جوا الوسط لما بمثل قدام الكاميرا والوحيدة اللي دخلت بيتها مدام لبلبة ودي هانم وحبيبة قلبي والفنانة إلهام شاهين ومنساش أبدًا إن في ظروفي الصحية مدام صفية العامري كلمتني ومدام لطيفة ومادلين طبر وميرفت أمين ودول عصر الهوانم ولغاية إنهاردة بيكلموني يسألوا عليا، واشتغلت مع مدام إلهام في فيلم في الأول خالص وهي من الناس اللي قربتلها من الأول، لكن اللي دايما مش بنكلم بعض لما بنشوف بعض كانت درة، وكنا بنعمل فيلم إسمه مصور قتيل مع إياد نصار وأحمد فهمي وبعد كده لقيت نفسي لا محطوطة في أفيش ولا في برومو”، متابعة: “لما روحت للشركة قالوا إزاي وسألوا المخرج وقال إن درة قالت كده وأخدت منها موقف وموجهتهاش وكلهم محطوطين الا أنا”.
