حلت الفنانة المصرية هنا الزاهد، ضيفةً على برنامج (صاحبة السعادة)، لأول مرة عقب انفصالها عن زوجها الفنان المصري أحمد فهمي، وروت تفاصيل وأسباب دفعتها إلى اتخاذ قرار الانفصال.
قالت هنا: “أنا افتكرت أول ما يحصل ده هتضايق وأغضب، لكن منزلتش دمعة واحدة بعد الانفصال، عارفة لما تحسي موضوع انتهى وبقى حاجة قديمة وتعالي أعالج هنا، وقعدت أركز مع نفسي”.
اقرأ: فنان كويتي يعرض الزواج على هنا الزاهد بعد طلاقها
تابعت: “عايزة أقول لأي بنت بتمر بحاجة زي كده أهم حاجة متبقيش لوحدك، خليكي مع عيلتك لإن عيلتك هتديكي الدعم، وأول ما حصل كده روحت علطول لعيلتي عند أمي وإخواتي وبقيت وسطهم، وتبقي مؤمنة إن ربنا فعلا بيعمل الخير، وكان عندي إيمان إن ربنا أكيد عارف حاجة علشان كده حصل كذا”.
كما اكدت هنا إن وقت وقوع الطلاق كانت منشغلة بتصوير فيلم “فاصل من اللحظات اللذيذة” وقالت: “كنا في آخر يومين تصوير، وهشام ماجد دخل عندي الأوضة وقال يا هنا إنت طول الفيلم عندك مشاكل ومش قايلة، وقلت له ده شغلي، وإنتو بتطلعوني من اللي أنا فيه”.
كما تحدثت عن مواصفات شريك أحلامها، قائلةً: “عمره ما يغير مني وإنه يكون راجل وأحس معاه بالأمان، ونفسي أعمل أسرة ومش عايزة الفن ياخدني من فكرة أني أكوّن عائلة”.
اضافت: “أنا بالنسبة لي الجواز، مقدرش أتخيل حاجة فيه اسمها طلاق، عمري ما أتخيلها، أنا حساسة جدا، ولو كان الطلاق تم بشكل مفاجئ كنت هتعب، لكن ربنا مهدها لي بـ8 شهور، أنا شخص روتيني، لا أحب تغيير نمط حياتي، ماينفعش الحياة مرة واحدة تختلف، ولو رجع بي الزمن، مش هقول لأ، هدخل التجربة دي واتعلم منها”.
استكملت تشير إلى رغبتها السابقة في انجاب اطفال من أحمد: “رسمت عن الزواج صورة مثالية وفراشات وأسرة وأبناء، أنا أحب الأطفال جدا، بس الواقع مكنش كدة خالص، الواقع كان عكس ما توقعته وحلمت به، وفي الآخر قسمة ونصيب، الحياة كلها صعود وهبوط ومش أي حد تصدقيه ومش أي حد تدخليه بيتك، ماتبقيش ماشية بعبط، عشان دايما بحس إن اللي قدامي هيتصرف زيي، لحد ما يثبت العكس، وكنت بحكي أوي عن اللي بيحصل بحسن نية، بس اللي قدامي مكنش كدة”.
اقرأ: كريم فهمي وزوجته لهما علاقة بطلاق فهمي وهنا الزاهد؟
وأضافت هنا الزاهد متحدثة عن ضرورة عدم تدخل الأهل في علاقة الزوجين وهو ما كان يحدث معها: “واكتشفت إن الجواز مش راجل وست بس، دي عيلة، بعد كدة بقيت أفكر أنا بعد كدة أبص للعيلة، مافيش حاجة لوحدك، في اتنين بيحبوا يقفلوا الدنيا على بعض وفي ناس بيخلوها سداح مداح، أنا بحب الدنيا تبقى متقفلة، أه طبعا لما يبقى في حد في حياتي هحترم أهله أوي، بس ما يبقاش التدخلات زيادة، أحب البيت يبقى مقفول علينا”.