روت الفنانة المصرية منى_زكي، تفاصيل قصة حبها للفنان المصري أحمد_حلمي، موضحة إن والدها كان يرفض زواجها منه في البداية.
قالت مني في لقاء مع برنامج (صاحبة السعادة)، مع الفنانة إسعاد يونس: (أول مرة قابلت حلمي كنت في مكتب المنتج محمد فوزي وكنا هنعمل مسرحية بطولة عامر منيب الله يرحمه وقالي فيه دور بفكر أجيب فيه أحمد حلمي ووقتها كان عامل برنامج لعب عيال بس معرفش شكله أيه لأنه بضهره وكنا بنتابعه من حلاوته فقولتله ياريت ده لذيذ أوي وعايزة أشوف وشه).
تابعت: (المهم لقيت حد لابس كاروهات وجينز ومبهدل سلّم عليه من غير ما يبصلي وقعد على الكرسي واتكلم مع المنتج وبعدين جاله تليفون وقام فـ محمد خدني على البلكونة قالي أيه رأيك قولتله رخم أوي قالي ده هيمثل انتو مش هتتجوزوا).
اضافت: (ابتدينا بروفات وبدأت أحس إنه لذيذ وأنا برضو بايخة مش بقول لذيذ على أي حد .. حصلت مشكلة وكنت همشي من المسرحية فجالي وقالي انتي مش جاية تاني؟ عشان لو هتمشي ناخد نمر بعض ونطمن على بعض وبقينا بنتكلم في التليفون ويقولي هتعملي أيه النهاردة وابقي قوليلي آجي معاكي وإذ فجأة بقينا صحاب جدًا وعرفته على صحابي القريبين مني وكان دايمًا بيحاول يلفت نظري وانا كنت قليطة أوي عشان خدت حب من أبويا يخليني متأثرش بأي حركة من أي شاب، وبعدها اعترفلي إنه بيحبني).
استكملت: (لما قالي كده اتصدمت كنت حاسة إنه عايز يقولهالي بس أنا مش عارفة أقوله أيه أنا مقولتلوش أنا بحبك بس هو صاحبي اوي وبحكيله أكتر من أي حد، وبعدين سافرت أشتغل طول منا في السفر دايمًا الموضوع في بالي ولقيت إن حلمي عنده نبل وحد حلو أوي من جوا، فضلنا نتكلم كتير وكل ما نتكلم مشاعر جوايا تجاهه بتكبر ووصلت لشعور إني مش هقدر أعيش من غيره فقولتله وأنا كمان بحبك، جيت أجس نبض أهلي لقيتهم بيقولو لأ وموافقوش على حلمي .. كانوا شايفينه بسيط وصغير ومش هيعرف يبسطني وأنا صمّمت عليه لغاية ما في مرة بابايا قعدني على رجله وابتدى يعيط وقالي مش عايز أضايقك بس هو ده اللي هيبسطك؟ قولتله أه فوافق).
اختتمت: (وحاول يزنق على حلمي في الاتفاقات وكل ما يلاقيه طيب يقول خلاص مش لازم كذا، وفي يوم فرحي بابايا ماسكني من إيدي فخالتي قالتله “يا علي إديها لأحمد عادي” وقعدت تعيدها كتير من كتر ماهو ماسك فيا).