هاجمت ريما الرحباني ابنة الأسطورة اللبنانية فيروز كل من هاجمها وتحدث عنها بالسوء، عقب زيارة الرئيس الفرنسي ماكرون إلى منزل والدتها, ورفضها لدخول الصحافة اللبنانية لتعطية الخبر لحظة تقليدها أرفع وسام.
اقرأ: ابنة فيروز تشن هجومًا ساحقًا على أبناء عمها وعلى مايا دياب وميشال المر
شرحت سبب رفضها، وطالبت بعرض أعمال فيروز الموجودة في (تلفزيون لبنان) وعلى شاشة LBCI. وتساءلت عن سبب عدم عرض المحطتين لما تملكانه من أرشيف ضخم لوالدتها.
اقرأ: أحدث صور لفيروز بعد غياب طويل
اقرأ: ريما الرحباني تهزأ من آل الرحباني: لو ما فيروز ما حدا بيِلكِشُن.. تفو
وتابعت: انتو بتريدوا سد بوزي ونااااام! والله بعرف! ده مُناكم! بس رح طمّنكن تترتاحوا “اون فوا بور توت” انو ما حَ يحصل رح ضل إحكي ورح كتر الحكي كمان! رح ضل احكي ليصير في عدل وعدالة! يعني مطوّلة كتير كتير كتير!طيب تنبلش هلق نفنّد النقاط فلقتونا بإنو “فيروز للجميع ومش ملك ريما” وعناوين طنانة من هالصنف ومن صنف “ريما تقصف” و”هجوم شرس” و”ريما تتوعّد” والى ما هنالك من عناوين بتهِد ركاب اللي عم يقرا او يسمع حسب.. فبيقروها الناس وما بيفهموا شي غير انو ريما هيّي المصيبة الكُبرى وأصل البلا تبع الشرق الأوسط كلّو ،من المحيط الى الخليج! وانو اذا نامت ريما منرتاح كلنا وكلكن والشرق الاوسط والمحيط والخليج! اوّل شي لطمّنكن ما رح ترتاحوا حتى لو نمت! لأن انا عندي ورثة اي اي مزبطة كل شي شو لكن هيك الدني فلتانة؟ عظيم! “سوسّي دي” هات تنناقش هلق ماذا تعني هالجملة
اقرأ: ريما الرحباني تفضح بعلبك والمتسلطين عليها كما المتسلطين على لبنان
وأكملت: فيروز ملك للجميع وفيروز مش ملك لريما”
اول نقطة فيروز مش غرض يُمتلك لا من الجميع ولا من ريما! فيروز انسان ورمز وفن وحضارة وثقافة وعُمْر وتعب وجهد وسهر وشغل ومسيرة وكرامة وعزّة ونُبل وَ.. شو بدّي عد لعد ما بيخلص العَد! وأهم شي يا حلوين فيروز، يطوّل بعمرا ويخليا فوق راسنا وراسكن وراس الجميع وخمسة بعيون الحاسدين، بعدا موجودة!
دونك هُس ولا كلمة! اذن اول إستنتاج طلع انو فيروز مش غرض يُمتَلك.. تنرجع للحديث فيروز مش ملك الجميع ولا شغلا وتعبا وعمرا ملك الجميع إنما ملكا وحدا بس! يعني انتو معتقدين اذا بتحبوها بتمتلكوها وبتمتلكوا شغلا وتعبا؟ ما فهمت! بعدين شو عملتولا لفيروز مثلا تتشاركوها ملكا وتعبا وعمرا ومجهودا ع مر الزمن؟ ميتين ومُستميتين تتشوفوا اعمال فيروز وفنّا!؟ عظيم! عظييييم! ليه ما بتطالبوا تلفزيون لبنان يعرض النوادر وما أكترها اللي نايمة بجواريرو؟ ليه ما بتطالبوا ال أل بي سي تعرض بعلبك وبيرسي ولاس فيغاس جزئين؟ او لنّو تسألوهن ليه هالأعمال مدفونة عندن؟ كان لازم يجي ماكرون تتذكّروا فيروز؟ وتعرضولا بيرسي؟ وهوليك يعرضوا الأولمبيا؟ تتبينوا حضاريين قدّام فرنسا؟ تفوووو.
اقرأ: أول تعليق لريما الرحباني بعد شائعة وفاة أمها فيروز
وأضافت: “تاني نقطة ما زال هلقد بتحبّوها؟ ليه ما بتسمّعونا الأعمال بصوتا؟ حدا بليز وضروري يشرحلي هالنقطة لأن هاي لحالا بقدر انا ارتكب عليها مجزرة بحجم المجازر اللي عم ترتكبوها أجمعين بحق هالإرث!
انو اذا بتحبّوا فيروز بتغنّولا اغانيها بوجودا؟ وبيدون إذن؟ وبتتاجروا فيهن؟ وبتشوّهولا أعمالا وبتغيّروا وبتحرّفوا؟ وبدكن ضل ساكتة وتقنعوني غصب عنّي انو هاي محبّة؟؟؟؟؟ انا منّي ضد بث اعمالا بصوتا وموسيقتا الأصلية! انا ضد التعربش على أعمالا والمتاجرة الرخيصة فيها والتشويه! وبعدين نازلين فينا مهرجانات وحفلات وشحادة على ضهر اعمال فيروز!! كيف هاي؟ لا احترام لا وعي لا فهم لا أدب ولا شي غير النهب والسرقة والاستغلال والتشويه!
وهيدا التشويه راجعتلو ع رواق بس نوصل لل ثانياً. هلق ضمن هالنقطة رح انسى للحظات قصيرة جداً الحقوق والتعدّي واحكي فقط بالأخلاقيات! اللي بدّو يغنّي لبيروت، مينيموم ما يكون ملقّح بالخليج عم يلكّح الأرض والإشيا اللي بتمشي ع الأرض تيقبض قرشين! ولا يكون سمع انو ماكرون بيحب لبيروت فبلش يتذلّللو بلكي بيسمع فيه ماكرون! وبيصير يلكشو شوي!
واللي بدّو يغنّي للجنوب بدّو يكون بيعرف الجنوب، وقدّيه قضّى هالجنوب، وكل جنوب، مش يكون كل همّو الجيوب والكروش والعروش والكعوب! واللي بدّو يغني في ظلام الليل بدّا تكون نفسو بيضا مش خضرا ولا مُظلمة اكتر من ظلام الليل! ايه والله الويل لإمّة!
الويل لإمّة كثرت فيها طوائفها وقل فيها الدين! والاهم يكون بيعرف شو يعني هالجملة ويطبّق ما بس يعرف! ويعرف انو الويل لإمّة تلبس ممّا لا تنسج وتشرب ممّا لا تعصر! ايه والله الويل الويل لها! وبدّو يكون بيعرف الفلاحون والكرامون والبناؤون مش بس سامعن بالغنية وبيقرف منن بالحقيقة! وما بدّو يكون جايي من الخليج معبّي جيابو ويضحك على الشعب المسكين اللي جايي يعرف أرضو لمين ولمين عم يموتوا ولادو وولادو جوعانين! ويذلّن ببسكوتة وكيس رز ويلهط الباقيين! واللي بدّو يغني احكيلي ووطني وبيقولوا زغير، مش لازم يكون عندو كرامة؟ والكرامة الأحلى!؟ ويكون بالحق كبير وما بيعتدي؟ مينيموم يعني! وحياتكتن وحياة المحبّة! صدقوني! الحق الحق اقول لكم! واللي بدو يتخبّى بالثوار بحجّة الثورة والانتفاضة اوّل شي بدو يكون ملاقيهن للثوار
وعارف ع شو ثايرين! ومش معلّق بناس عم تقطّع طرقات ع غير ناس او ناس عم تهدّم محلات غير ناس! وناسيين انو هولي اللي عم يهدّمولن محلاتن هني الوحيدين اللي بعدن مشغلين جزء من الناس اللي معاوزة تشتغل… ولا جماعة ارغيلة وهيصة وفولكور وشبّيحة الحرب! اللي الله لا يردّا ولا يردّن! ونحنا الحرب عشناها وقضينا منها، مش كنّا ميطئين ب پاري ودبي وسوريا والخليج ونلكّح كعوب ونتبَكبَك ع الوطن نحنا وعم نتفرّج عليه “لو سوار” عال تي ڤي! “نو مي زامي” نحنا كنا هون عم نتوقّف ع نهر الكلب وننذّل وندفع خوّات ونمرق بين قنصة والتانية ع الرينغ كل يوم وكل لحظة! اللي بدو يعمل ثورة اولا بدّو يكون وطني مش حزبي ولا طائفي ولا عميل ولا بيقبض ولا بيرتشى واللي بدو يعمل ثورة بدو يروح ع بيوت السياسية يقبّعهن من بيوتن واحد ورا التاني هني ومحطّاتن الإعلامية على انواعا.. مش يلك ع طايفتو وحزبو باوّل ثانية ويجي يجعّر لماكرون انو تعى حكمنا وشيل هالطايفة عنّا.. والأمثلة ما بتخلص بس تصيرو بهالمرحلة منحكي عن ثورة! الشعب الحقيقي ثاير بصمت بيدون المهرجان والإستعراض تبعكُن لأنو للأسف هوّي الأقلية وقرفان منكن ومن ثورتكن الكذابية! غير هيك ما حدا يقلّي لبيروت ولوجه بيروت!
لا تركتو بيروت ولا تركتو وجه! اللي بدو يحكي ع غيرو ما بدو يكون بيتو من قزاز! أيّة قزاز! باردون غلطت! تَنَك وأنجأ.. من ايمتى الاعمال الخيرية بتتصوّر لايف انو شوفوني يابا شو عم اعمل؟ هيدا اكبر دليل انو عم يلهوكن تما تشوفوا فعلا شو عم يعلموا! كل عمري بعرف انو اللي بيعمل خير بيعملو ع السكت مش لايف عال تي ڤي وع الانترنت! ذكّروني بصاحب نينكس كيف كان يطلع يصوّر واحد ربح الجايزة بعد عشر سنين شراية نينكس يا حرام، عل وعسى شي نهار يربح! ونقشت فجأة معو بالغلط بالسنة العاشرة! فجابوه عالتلفزيون بوجود مسيو نينكس اللي واقف حدو مع الشيك الهديّة ورافض يفلت الشيك من ايدو! لا بحلال ولا بحرام! ويكمن بعد “الكَتْ” كان يسترجع الشيك! الله وحده بيعرف.. والمُخرج يِمكن! ايييي اللي بدو يعمل عمل خيري ما يعملوا ع الإعلام وما يتاجر فيه انو شوفوني شو خيري ومنيح انا والأهم ما يعملو من كيس غيرو! اي بكره السياسة من كل النواحي لأنّي ما بطيق المسايرة والدجل والخبث حاصلنّه مش هيدا حديثنا هلق! حديثنا انو “ريما غير أهل انها تكون مسؤولة عن هالإرث”! مين لكان بدو يؤتمن على هالإرث؟ انتو؟ يللي بتقبضوا من الخارج؟ يللي بتبيعوا وبتشتروا؟ والا يللي كانوا فرفطوه وباعوه شقف دعايات لوما ريما سادتلن الطريق؟ مين؟وبيلتقي ناس ع صفحتي تقلي اني سخيفة وما عندي شي تاني اعملو غير اكتب بوستات مملة! فاين! هلق للصراحة عندي شي تاني اعملو بس اذا ع إرث عاصي وفيروز ما بدّي ضيع وقت ع شو بدي ضيّعو لكن ع الأركيلة وطق الحنك؟ والا ع برنامج الدواليب اللي بتبرم؟ والا ع الإجتماعيات السخيفة تبعكن والپي آر والوعظ ع الشاشات والإبهار الرخيص؟
وختمت: “انا مؤتمنة على هالإرث الفنّي من اللي صنعوه شخصيًا وعلى كل ما يتعلق فيه!
اي اي متلما عم خبّركن! ليه إنسمّيتوا؟ طبيعي نو؟!
ف شيلو عنكن كلياً هالموضوع وصلنا للثانياً أبشروا
ليش ال ال بي سي نطرت تإجا ماكرون تتحط بيرسي؟ عندا بيرسي وبعلبك ولاس فيغاس.. ليه ما بتحطّن؟ ليه نايمة علين؟ ما بيجيبوا دعايات؟ إممم! برامجا المنعادة من ست سنين وعشر سنين واللي هيي كناية عن ألعاب سخيفة مر الدهر عليها وشرب هاي بتجيب دعايات؟ اذا فكركن أدوات وإرهاب داعش بس بالبواريد والمتفجرّات غلطانين كتير، داعش كمان بيلبسوا بدلات وعندن مراكز ومكاتب ومنابر وظيفتا تحطيم وتهشيم الحضارات وكل وج مشرق. واللي حاصل كلو بيندرج ضمن مخطط داعش. داعش الفن اللي بدو يهدم حضارة الشرق والفن! كلن مشتركين وعم يساهموا عن معرفة او عن جهل بتنفيذ هالمُخطط! كلن يعني كلن!
ميشو وشيشو وشاشا وشوشي… مسؤولين عن أجندة التهديم الفنّي اللي بيخوّف اكتر من تهديم الحجر!
الناس اللي عندا وعي وبُعد نظر، مش ناس هالعصر اكيد، واللي عم يراقبوا كل اللي عم بيصير، اكيد ملاحظين انو كل هيدا مش بريء! في مخطط صهيوني ومن زمان كتير ما بيخفى عن حدا لتدمير منطقة الشرق الاوسط والكل عم يساهم فيه واهم واشرس تهديم حاصل بالحضارة والثقافة والفن!
والمعروف لاللي بعد ما بيعرفوا انو تتدمّر بلد وتمحيه عن بكرة أبيه بيكفي انك تهدّم اول شي حضارتو!
وهيدا الحاصل تماماً بالفن العربي عامةً واللي حاصل تحديدا بإرث فيروز والاخوين! وهيدا اكبر دليل انو كلامي لا لُبس فيه! ع كلّ راقبوا ولوحدكن بتفهموا. التعتيم على اعمال فيروز الأصلية ممنهج ومبرمج.
الإصرار على ابراز العهر الفنّي وبتمويل غير مسبوق وعلى المضي قدما رغم التحذيرات المتكرّرة بنقلو للأجيال الأخرى بأصوات العهر وبالتشويه المحتّم. بدكن اسكت؟ وبرأيكن معقول إسكت؟ فشرتو انتو واسيادكن اهجموا عليي تتشبعوا وإغسلوا عقول الناس تتشبعوا الحقيقة بالآخر بتسطع متل الشمس! والحق ما بيموت! هيك قلي بيي! ولَوْ لوحدي مشيت وواجهت الكل! رح حصّل حقي غصب عن رقبتكن! ورغم اني بكره السياسي كتيرالا إني انا مع سياسة النأي بالنفس! بس مش لازم بالاوّل يكون عندو نَفْسْ تينأى فيها الواحد؟مبلا اكيد! انا بقدر احكي برياحة ضمير وحرية مطلقة لأني الحمدالله بتنقطع عندي الكهربا والمي متلي متل الناس الحقيقيين وبشحد مصرياتي من البنك متل الناس الحقيقيين مش متل الشبيحة! وبوقف بالصف وع الإشارة وبنطر دوري… لا بجيب مصاري بالشنط السودة ولا ببيض عملة ولا بقبض معاش! بحتقر المصاري اكتر مما ممكن تتخايلوا، ومن معتقداتي انها هيي سبب البلا كلو! والحمدالله ما بقبض من حدا حتى ثمن اتعابي ما بقبضو! ولو بحب المصاري متلما عم تغسلوا عقول العالم، ما في لزوم قلكن انو كنت فيني كون بسبح فيها، تما قلكن كان فيني طمكن بالمصاري، وتنخدش مشاعركن! اما انتو يا عُملا الوطن إذا في نُبل وحَق وكَرَم و كرامة بهالدني، عنوانُن فيروز وعاصي، بالحياة وبالفن، هنّي الوطن الوحيد الحقيقي والراقي ما بتقربلو السياسة تبعكن ولا بيعرفا. العظماء بالتاريخ يا إخوان ما بيِتبَعوا إنّما يُتبَعوا. وهنّي اللي بيسطروا التاريخ وبيِصنَعوا قوالب ومقاييس القِيَم والمواقف، وبعاد كل البعد عن حروب النفوس الزغيرة. فَ اوعكن توجّهوا حديث لبيت عاصي وفيروز اللي عملولكن وطن قمتوا بعتوه بفرنكين!
