نفى الموزع الموسيقي المصري أحمد إبراهيم، الشائعات التي انتشرت عن انفصاله عن زوجته الفنانة المصرية أنغام، وعودته لزوجته الأولى ياسمين عيسى، ابنة شقيقة المخرج طارق العريان.
نشر إبراهيم تعليقاً مطولاً عبر صفحته على الإنترنت رداً على صحافية مصرية نشرت الخبر ورفضت نفيه رغم تواصل طليقة أحمد معها ونفيها لصحة ما نُشر:
(قال النبي (ص) مِنْ حُسْنِ إِسْلَامِ الْمَرْءِ، تَرْكُهُ مَا لَا يَعْنِيهِ
هي مش ام اولادي بعتتلك وقالتلك انفي الخبر على لسانها وانك غير مصرح ليكي تتكلمي عن حياتها الخاصة ؟ مش هي صاحبة الشأن ؟
في فرق بين خبر فني ومعلومه شخصية لا اعلم المكسب من وراها!
وبعيد بقى عن صحة الخبر من عدمها لانها ماتخصش حضرتك ولا المتابعين لان حياتهم فيها ما هو اهم اكيد .. مش المفروض لما صاحبة الشأن تنفي خبر وتطلب منك زي ما كتبتي خبر من غير ماترجعيلنا تتاكدي لانه امر شخصي ليا واولادي وبيتي انك تنفيه على لسان صاحبة الشأن زي ما كتبتيه ولا سيباه ينتشر ؟ هيفرق معاكي صحة الخبر من عدمها في ايه هو انتي اللي هتصرفي على اولادي ولا عايشين عندك في البيت على حسابك؟
حضرتك قاصده تحرجي ام اولادي اللي بيني وبينها كل احترام وحب وتستفزي اهلها بالخبر ده انها رجعت بعد اعلانها طلاقنا بسبب زواجي (اللي انا بلغتها بيه واديتها حرية الاختيار)، ولا عاوزه تخلي الناس تتهمها انها كانت عامله فيلم غاويه شهره ولم تعاطف وفي الاخر رجعتلي؟).
تابع موجهاً كلامه للصحافية:
(ولا قاصده تحرجي زوجتي المشهورة وتحطي اسمها في الخبر عشان الخبر ينتشر ونبقى مسار للهري من شوية المرضى اللي في مجتمعنا الحشري باعتباري تعيس معاها مثلا ولا انتي فاكره الناس طيبين قوي لو صح الخبر هيشوفوها جدعه اتصرفت بحكمه واحترمت خصوصياته مع اولاده وهيسيبوها في حالها؟ وليه في التوقيت ده بذات اللي هي متألقه فيه سواء بنجاح البومها وحصدها لاكتر من جايزه للالبوم او كونها اكتر مطربه مصريه بتحيي حفلات كبيرة داخل وخارج مصر!!
ولا قاصده تطلعيني انا بلعب وعاوز الم عليا الستات واعمل شو زي ما في اغبياء اتهموني رغم اني فضّلت اني ااجل خبر جوازي عن الاعلام شهور يعني مافيش اي نيه للشو الى ان تسرب الخبر من جانب احد المقربين!
ولا قاصده تطلعيني ندمان على زواجي رغم ان اولادي مازالوا في بيتي في رعاية امهم في نفس شارع الستوديو بتاعي وبشوفهم واتطمن عليهم يوميا وبيقعدوا معايا اكتر ماكان بيحصل قبل الازمة ؟ وتقدري تشوفي ستوري الانستجرام عندي يوميا سوا!
ايه هي الكرامة يعني اللي في مهنتك اللي تدي حق لحد يتكلم عن حياة غيره الخاصه ولا انتم عاوزين الناس تكفر بكلام النبي واومر ربنا واياته في عدم الخوض في حياة الناس؟
ليه مافيش احترام لبيوت الناس ؟ احنا لسه هسخن الناس تاني والاغبياء يرجعوا يقولوا ساب بيته وعياله وسرقته من بيته والهجص والسفالة دي كاني عندي ٣ سنين!! مش كفايا ساكت على الكدب والتضليل من البدايه ورفضت ادخل في خصومه مع ام اولادي والنتيجه ان علاقتنا اتحسنت كتير رغم حجم الازمه اللي افتعلت من الاعلام!
مش كفاية الحملات الممولة ع الانستجرام لتشويه صورتنا لصالح وراها شخصية مريضة!
ايه علاقة ظهوري انا وزوجتي المشهورة كزوجين في برنامج باننا كمواطنين مش من حقنا ان حياتنا الخاصه تُحترم؟ ليه نشعل فتنه تاني بعد ما تحملت انا وزوجتي المشهورة التجاوزات عشان نعدي الازمه لان في اولاد والحمد لله مستقرين وسعداء حاليا عن وقت الازمه ليه تضيعي مجهود كل الاطراف في تهدئة الازمة !
واحدة في شهور عدتها وفي الرسالة بتقلك انفي الخبر لان علاقتنا ممتازة يعني انتي عشان تلمي الناس عليكي تبوظي الدنيا
هو الفيلم البلدي ده مش هيخلص!!
هل حضرتك هتجيبيلي انا وزوجتي المشهورة حقنا من التجاوزات والافتراء اللي في تعليقات الحشريين في البوست عندك او عند الناس اللي نقلت الخبر اللي هما اساسا تم شحنهم ضدنا بمهارة من بداية الازمه بطريقه عاطفيه وسكت واحتسبت ربنا؟؟
المفروض دلوقتي انزل صور ليا مع زوجتي المشهورة فا اتشاف كياد وتافه ؟ ولا اعمل راجل واقول الشرع محلل ٤ ارجع مارجعش انا حر ؟ ولا المفروض استنى حضرتك تجيبي واسطه وترشي موظف حكومي يطلعلك عقد يثبت رجوعنا كزوجين بما انه امر خاص يعاقب عليه القانون ومش مهنيه ولا نجاح من حضرتك ان كان حصل ورجعنا اصلا!
اختتم كلامه: (لاخر مره ماتتكلموش تاني في امور بيتي من فضلكم غير مصرحلك ولا لغيرك يا استاذه يا فاضلة تكتبي او تتكلمي تاني عن حياتي الخاصة باي خبر سواء صح او غلط ده امر شخصي بحت مش المفروض ابرر او انفي او انزل تاكيد دي حياتي انا بس كفايه تجاوز بقى!! حضرتك كبيرة وبحترمك من فضلك اتكلمي في حاجه تانيه كفايه الخبر قعدله ٣ ساعات وانتشر وعمل الضجه المطلوبه كفايه بقى .. انا احتسبت ربنا في كل تجاوز في حقنا وفقد الامل في ذوق الناس خلاص).