يتعرّض المذيع المصري باسم يوسف لهجمات وشتائم عدّة كلّما تواجد على الشبكة العنكبوتية أو بعد كل تغريدة يكتبها أو رأي يصرّح به، كما أغلبية نجوم الوطن العربي، ولهذه الأسباب قرّر باسم يوسف كتابة وصاياه الـ 10 وجاءت كالتالي:
( دي نصيحة متواضعة احب اديها لاي حد على السوشيال ميديا سواء مشهور قوي او نص نص او مجرد عنده متابعين او حتى شخص عادي فاتح صفحته على الفيس بوك. و بما ان بقالنا فترة الناس بتحطها في صورة قواعد اللي مش عارف ايه الاربعون، و الوصايا العشرة لاي حاجة، فدي الوصايا العشر بتوعي في الموضوع ده.
1- مافيش أي شئ يستاهل انك تضيع حياتك وأعصابك وراحتك النفسية في ركن التعليقات سواء على تويتر، أو يوتيوب أو انستجرام أو فيس بوك.
2- اللي بيشتم وعامل فيها سبع رجالة عليك، لو شاف أكتر من تلات تعليقات بتشتمه حيلف حوالين نفسه طول اليوم. فما تخليش حد يبتزك لما تيجي تعمل بلوك ان انت خايف، او جبان، او ضد الديموقراطية. تعليق واحد يء ممكن يبوظ يومك. فما بالك بعشرة او مية.
3- أنا أخدت قرار من فترة و القرار ده كان له اثره الايجابي جداً على صحتي النفسية، هي عدم التفاعل مع الشتايم أو الهجوم على الانترنت لأن مافيش حد بيكسب نقاش على الانترنت وفي الآخر وقتك ومجهودك وصحتك النفسية بيتم استهلاكهم.
4- ما تتردش في البلوك أو كما قال المثل الشهير (بلوك بلوك بلوك). اللي حيشتمك و لا حيغير رأيه فيك و لا انت في يوم حتثبتله إنك صح وييجي ويقولك حقك عليا ولا أصلا له اهمية لأنه مالوش قيمة لو طلع من ورا الشاشة.
5- شغل التحفيل ده كبرنا عليه وما عدش حد بيتعلم عليه على تويتر و فيس بوك، لأنك لو عملت بلوك فده بيحصل في كون موازي انت مش دريان بيه ومش فارق معاك.
6- أنا ايدي بقت تقيلة جدا في البلوك بقالي سنة أو أكتر ومش شايف ده جبن أو ضعف زي ما بيحاولوا يقنعوك. في الآخر المود بتاع الصفحة بيفرق جداً والسلبية بتاعة الشتايم ممكن يقفل ناس تانية انها تتابعك. فبمنتهى البساطة اللي بيشتمك، بيحتقرك، مش مستظرفك، مش طايقك، لما تعمله بلوك، انت بتريح نفسك و بتريحه لانك بتمنعه من دخول صفحة واحد بيكرهه ، فعلى ايه التعب؟ و في نفس الوقت بتنضف الصفحة بتاعتك و تدي الفرصة للي عايز يتابعك يعمل كده بدون حاجات تقرفه و تقرفك.
7- حاجة لطيفة ابتديت اعملها وهي اني مش بس باعمل بلوك ، لا أنا الحقيقة وصل الأمر اني باشوف كل اللايكات على التعليق المسيء واعملهم كلهم بلوك… مرض بقى بعيد عنك. بس بصراحة لو واحد فرحان وبيساند شتيمتك، لازمته ايه يفضل في صفحتك؟ فاه انا باطاردهم واحد واحد، في الجحور والجبال والكهوف وأجيب عيلتهم وأصحابهم واحد واحد وأعملهم بلوك بلوك بلوك. راحة عظيمة.
8- كلام بديهي: تعليقات من نوعية يا عم قرفتنا بقى بكلامك عن كذا.. مالوش أي سبب منطقي لأني مش بادخل أوضة نومك وازعقلك في ودانك. مش عاجبك اطلع من الصفحة.
9- كلام بديهي (٢): لا البلوك مش ضد الديموقراطية ولا حرية الرأي لأن أنا ما منعتكش تعبر عن رايك ولا دخلت صفحتك اقولك تقول وماتقولش ايه. صفحتي هي بيتي وليا مطلق الحرية اني امنع اي حد بيهاجم او بيشتم. و موضوع ان انت شخصية عامة و لازم تسمع شتيمتك، ده مش عذر ولا شئ مقبول ولا لزام عليا اني اقبله. سيبنالك الديموقراطية و سيبنالك الاحتمال و الجلد على وساخة الانترنت.
10- اللطيف بقى في كل ده اني بقالي فترة مش باخش اصلا على التعليقات. أنا سايب ادارة الصفحة لكذا صديق وهما اللي بيقوموا بمهمة البلوك بلوك بلوك، ومهمة مطاردة اللايكات على التعليقات الوسخة وبلوك بلوك بلوك.. ومريح دماغي تماما. وانا بانصح الناس انها تعمل كده لو يقدروا. وشكرا.