نشرت الممثلة والكاتبة اللبنانية كارين رزق الله صورةً لها، وكتبت تؤيد مطالب اللبنانيين المنتفضين ضد طبقتهم السياسية الحاكمة وتروي ما يريدونه على لسانها.
كتبت: (بدكن تعرفوا انا مع مين؟؟ انا مع اللي بيعطيني كهربا ومي ٢٤/٢٤، مع اللي بيعمللي طرقات توصلني عشغلي بأقل من ساعتين كل يوم، مع اللي بضويلي طرقاتي مع اللي بيحزر انو بتشارين معقول تشتي وما بيتفاجأ كل سنة بالشتي وبتعوم عليي الطرقات، مع اللي بنضفلي بحري ومنطقتي من الزبالة مع اللي بيعمللي بنى تحتية وما بخلليني لا اشرب ولا اسقي مزروعاتي من مية المجارير، مع اللي بأمنلي شيخوخة محترمة بعد التعب اللي عم بتعبو بحياتي، مع اللي بأمنلي فرص عمل لولادي بس يتخرجوا).
تابعت: (مع اللي بأمن لموظفينو الحد الادنى تيعيشوا بكرامة بلا ما يضطروا ينرشوا، مع اللي بخللي محاكم بلدي تحكم بالعدل بلا تدخلات ووساطات، مع اللي بطلعلي الغاز من البحر، مع اللي بنظم دخول الغربا وشغلن بالبلد، مع اللي بيقصف عمر كل حرامي بجرب يمدايدو عالمال العام، مع اللي بيمنع الهدر بالمؤسسات العامة).
أضافت: (انا مع اللي بحب بلدي قد ما انا بحبو… وعفكرة هول المطالب هني اقل حقوقي كلبنانية، هول الحقوق اللي بدفع ضرايبي كل سنة ليكونو مأمنين… جيبولي شخص صيني ما بفهم علي ولا كلمة خلليه يردللي حقوقي المسروقة وانا راضية يحكمني ولو ما بفهم عليه ولا بيفهم عليي!!!).
